معلهش. ..أصل السيستم واقع

مين فينا لم يسمع هذة الكلمه
تكلم شركه الانترنت الدعم الفنى ..ها معلهش يافندم ممكن حضرتك تكلمنا كمان ساعه
أصل بنحدث السيستم. .
تروح النقابه علشان تدفع الاشتراكات والفواتير وكل الحاجات ...معلهش يافندم
أصل السيستم واقع.....

تروح البنك..البنك ياظلمه. ...
أصل السيستم واقع..
أصل الماكينه دى بتاكل الكروت😨
أصل الموظف اللى معاه الختم مش موجود 😢
المرور ..وماادراك ما المرور
إنا لله وإنا إليه راجعون
لازم السيستم يقع لأن الموظفه المبجله بتعامل مع الكمبيوتر اللى قدامها على أنه صينيه الأكل
اللى بترص عليها الساندويتشات....ودى اللى احنا شايفينا آمال اللى مستخبيه بتعمل فيه ايه
مش بعيد صينيه بطاطس بالفراخ.
آه يانى😣
فى جمهوريتنا اكتر سفارتين عليهم إقبال للحصول على التأشيرة (حسب معلوماتي المتواضعه)..هما
السعوديه وأمريكا. ..
الناس اللى حاولت تاخد تأشيرة امريكا قبل كدة عارفه أن العمليه ماشيه  بخطوات متسلسله مرتبه
لازم تخلص نمرة 1 علشان تنقل لنمرة  2
ولو نمرة 1 غلط أو فيه معلومه مش كامله مش حتتنقل للى بعد كدة أبدا.
وكل شيء محسوب ويعتمد عليك أنت فقط بدون أى شخص آخر.
ولما تاخد الميعاد لما يكون ايه ميعادك ثابت ومالهومش دعوة لا بسيستم  ولا غيره.
أما فى السفارة السعوديه..وفى حاله تقدمك للحصول على تأشيرة العمرة فأنت داخل إلى عالم مبهم
مش عارف حتاخد الباسبور امتى ..ولا حتاخد الفيزا ولا ايه
ولا حتى تعرف الشروط  
ولا تعرف ترتب حاجه لأن ممكن بمنتهى البساطه😣😣😣😣
السيستم يقع...
تخيل مصالح الناس وترتيبات السفر والأوراق اللى لازم تحصل بعد ماتاخد التأشيرة
سواء إجازة من العمل أو الدراسه ..لازم التأشيرة
تصريح السفر من التجنيد...لازم التأشيرة
انت نفسك ذهنيا وبدنيا ونفسيا لازم تكون مستعد للسفر
يعني ماينفعش يكون ميعاد سفرك كمان 5 أيام وانت مش عارف اذا كنت حتسافر اصلا ولا لأ. ..
ليه؟؟؟؟؟؟
أصل السيستم وقع..
ليه فى السفارة الامريكيه السيستم مش بيقع؟؟؟؟
عاملين سيستم كويس؟!
كل الأماكن اللى بتشتغل بالكمبيوتر بتعمل سيستم كويس
آمال ايه؟؟؟
اقولك وماتزعلش
اللى بيشتغل على السيستم بيدرب كويس...ولو مرة السيستم وقع بيشوفوا السبب ايه
لو السيستم...نصلحه
لو الموظف...ندربه تانى
ولو أتكرر. ..مافيش دلع نعاقب يامعلم
أقصد اقول انهم بيعملوا صيانه وتدريب للبرنامج والموظف
لكن احنا مانعرفش كلمه صيانه احنا نطلع روح الحاجه لغاية لما تقف خالص ونقول
السيستم وقع
والموظف بنعمله 100 تدريب و100 سيمنار و100 محاضرة
وهو يهرب منهم كلهم واحنا نشوف دفتر الحضور وهو ماضى ونقول..الراجل حضر أهو
يبقى السيستم هو اللى وحش،
حد امتحن معلوماته وعرف هو استفاد ولا ايه
حد من المراقبين راح حضر المحاضرات دى وتأكد من نسب الحضور....
الضمائر اللى سيستمها وقع من زمان ...ياريت تقعد جنبه وتريحنا  منها..

ليه مايكونش فى كل مطار وميناء سفر برى أو بحرى وحدة لتخليص تصاريح السفر
متصلةبالتجنيد مباشرة لأن كتير من الناس بتتعطل عن السفر بسبب الورقه دى
ليه مايكونش فيه وحدة تنفيذ أحكام خاصه بالغرامات الماليه من مخالفات ومتاخرات ماليه
قد ينسى الشخص سدادها فيحصل على حكم وهو لايدرى به شيء يمنعه من السفر.
وأمور كثير بتضيع علينا وعلى الدوله أوقات كتير، احنا مش حاسيين بقيمة الوقت..

الغرض من هذه الأمور المرونة والتيسير على المواطنين ،وتوفير الوقت والجهد
والشعور بالادميه فى التعامل مع الموظفين،

#السفر#السفارة#الوقت#التصاريح#السفارةالسعوديه#السيستم#وقع#

فى دار الأشعة

موقف ومشاهد.....
التهاب حاد بالجيوب الانفيه. .كان السبب للذهاب لعمل أشعه مقطعيه على الجيوب الانفيه لمعرفه سبب الالتهاب الذى استمر لأكثر من شهر ولم يحدث اى تحسن مع كل المضادات الحيويه والالتهابات والحساسية وكل المضادات اللى الواحد سمع عنها.
بعد تقديم الأوراق المطلوبه وأثناء الجلوس لانتظار دورى تفحصت الوجوه من حولى ..سبحان الله  كأنه لايوجد شخص سليم المكان مزدحم وامامى أكثر من ساعه ولكن الخدمه سريعه قدر المستطاع.
حولى أناس مختلفه امرأة حامل حضرت مع زوجها لعمل أشعه لم تتوقف عن الحديث ..الموبايل فى الطرحه ولا أعلم هل كانت تتحدث فى الموبايل أم مع زوجها فهو لم ينطق طوال الوقت،
رجل مريض حضر بصحبة امرأة ورجل وكالعادة الرجال صامتون والمرأة تتكلم فى الموبايل وتقص حاله المريض على من تحادث كأنه حدوته،
هل من حقنا أن نتكلم عن الحاله الصحيه لمريضنا بدون أذنه وأيضا أمامه وقد يكون لأناس هو لايحب أن يعرفوا عن مرضه؟

إذن المغرب وبحثت عن الحمام للوضوء....وهنا سؤال؟؟؟؟؟؟؟؟
لماذا حمامات الأماكن التى نذهب اليها للعلاج تكون أسوأ حمامات مع أنه من المفروض أن هذا مكان معقم ونظيف؟؟؟
سواء هذا الحمام فى عيادة خاصه أو مستوصف أو مستشفى أو حتى معمل تحاليل
إلا من رحم ربى لأن التعميم مرفوض
المهم ذهبت إحدى الممرضات عن مكان اصلى فيه ........وكانت الكارثه.....
ادخلتنى إحدى الغرف الخاصه بعمل السونار وبها أدوات طبيه وأدوية كثيرة وقالت لى ....اقفلى الباب عليكى وصلى براحتك
سألتها بذهول. ..متاكدة؟؟
قالت ..ايوة خد راحتك
وطلعت وقفلت الباب وراها...
هو انا علشان قلتلها أن عايزة اصلى تدخلنى مكان ممنوع أدخله هو دة صح؟؟!!
بعد قليل..نادت الممرضه على أسمى وادخلتنى فى غرفه الانتظار..غرفه لها بابان باب ناحيه المكان الذى كنا نجلس فيه وباب يدخلك على مكان الاشعه،غرفه صغيرة جدا لاتتسع لأكثر من شخصين ولو أحد منهم سمين ستكون هناك مشكله..
باب الغرفه أيضا ضيق لايستطيع من يستعمل الكرسى المتحرك أن يدخل بسهوله كان يجب مراعاه ذلك عند تصميم المكان ..
نظافه المكان ....واحد من عشرة
المهم ..حضر طبيب شاب واضح انه حديث التخرج سالنى عن الأعراض التى أشكو منها وهل هذه أول مرة اعمل فيها الاشعه ولماذا وكان مبتسما وطماننى كثيرا،الحقيقه سعدت جدا أننا بدأنا نهتم بهذا الجانب الانسانى وعلاقته بحاله المريض...
الممرضه فتحت الباب المؤدى إلى حجرة الأشعة، ، درجه حرارة المكان منخفضه بشكل كبير عن الخارج...
السرير بحاله المريض السابق لم يتم حتى ترتيب الغطاء...فمابالكم بتعقيمه
لم أكن أعرف أين أضع حقيبة يدى سألت الممرضه قالت لى هنا ...على نفس سرير الاشعه تحت قدميى. .ولا اى أندهاش
المهم ،،بدأ الجهاز فى العمل ماتتحركيش ثبت رأسك  تمام خلاص
انتظرى في الخارج علشان تعرفى متى تستلمى النتيجه
اللى بعده،،،دخل المريض لا تعقيم ولا اى حاجه خالص.
فى الخارج..كاننى غبت عام فى الداخل فجأة ازدحام المكان
شاب صغير مريض معه والده ووالدته
طفله لم تتجاوز الشهور الأولى تتألم بصمت وتبكى كأنها فى عالم آخر. .
حضرت الممرضه وابلغتنى  بموعد استلام الاشعه ..شكرتها واتجهت إلى الخارج
وفى رأسى مئات الاسئله تبحث عن إجابات
لماذا الأماكن التى يجب ان تكون نظيفه ومن فيها يعلم خطورة ذلك تكون هى الأسوأ ؟؟
لماذا نهرب من حمامات الأماكن التى نذهب اليها مع أنه يوجد دائما عامل أو عامله نظافه لهذه الحمامات؟؟
لماذا عندما ندخل حمام  نظيف وجاف نخرج منه وقد امتلأ بالماء على الحوض والأرض  ؟؟
لماذا لا توجد شركات متخصصه لنظافه وتعقيم العيادات والمستشفيات تعقيم وليست مسح الأرضيات فقط؟؟
لماذا سلوكيات النظافة عندنا صفر(إلا من رحم ربى) مع أننا نعلم أن النظافة من الإيمان ؟؟
لماذا .....؟
لماذا .....؟
لماذا....؟
اسئله كثيرة تحتاج إجابات
هل ساجد اجابه عند احد؟؟؟

#جهازالعلاج

#الاشعاعى#لمرضى

#السرطان

الاكتئاب. .حله الخميرة

منذ سنتين و شهري اكتوبر و نوفمبر عاملين معايا واجب كئيب

من فقد احبه....لاخبار مش سعيده....لمقالب من الاهل....وكملت السنه دي
الشتا الي لا هو شتا ولا هو صيف
وكمان على الصعيد الخارجي
حال البلد....مخلي الناس كلها في حاله من عدم الاتزان الغير طبيعي .الغير منظقي
طيب اعمل ايه؟؟؟؟
لو غرقت في الاكتئاب....مركبي الصغير(اسرتي)
ح تضيع...ماينفعش

نرجع بالزمن كده.....ليه الست امينه والست نينه وكل الستات الكبار في الافلام الابيض و الاسود لا يصابوا بالاكتئاب البشع بتاعنا
اعتقد شويه احباط خفيف ....حبه نكد لزوم العيشه ...عادي يعني......لكن اكيد مش زي حالنا
علشان كان في خبيز في البيت

مش بهرج..... خبيز..... الناس دي كلها كانت بتخبز بالخميرة اى حاجه وكل حاجه

طيب ليه المثل بيقول :"يقطع الخميرة من البيت"
لان دى حاجه مهمة في الحياة ولما تنقطع الدنيا بتكون وحشه
طيب.....انا مجنونه ....ماشي
جربيها بنفسك
مودك مش حلو .....طلعي من على النت اى وصفه سهله لاى عجين حادق  او  حلو  بس بخميرة
وشوفي ريحه الخميرة قبل الفرن وبعد الفرن ح تعمل في مودك ايه!!!!!
يا الله......حاجه ولا الخيال
يا جماعه تعالوا نرجع تاني لاصولنا .....ح  تفرق معانا كثير.....:-)
اكثروا من الاستغفار

ماسح الأحذية

المشهد..
رجل متوسط العمر..يحمل كرسى خشب فى يده اليسرى ويضع السيجارة فى فمه..وعلى كتفه الايمن يعلق صندوق كبير مقسم الى اقسام كثيرة يحتوى على انواع مختلفه من الورنيش والفرش والقماش لتلميع الأحذية  المختلفه..جالس بجوار احدى العمارات ينتظر احذيه السكان ليلمعها.
الخاطرة..
جذبنى منظر هذا الشخص فبحثت على الانترنت عن اصول هذة المهنه ووجدت انها ظهرت فى امريكا على يد المهاجرين الايطالين واليونانين ثم نقلوها الى مصر..ومن هنا بدات
وفوجئت  ايضا ان هناك فيلم هندى قصير اسمه ماسح الاحذيه وايضا فيلم عربى عن نفس الموضوع..
وهناك اكثر من مقال عن ماسح الاحذيه الذى يتحول فى المقال بلاعق الاحذيه للسلطه ليصل الى غرضه..
الملفت ان هذة المهنه كانت للصغار من الاسر الفقيرة ليساعدوا اهلهم حتى يكبروا ويستطيعوا ان يعملوا فى مهنه تدر مبالغ اكثر..فلا نجد رجل  كبير يمتهن هذه المهنة الا قليلا جدا..
ورغم هذا فإن هناك الكثيرين ممن نجحوا فى حياتهم بداوا كماسحى احذيه..كرئيس  البرازيل مثلا

والجوهرة السوداء بيليه.

ورجل  كان يتبرع لمستشفى السرطان بكل بقشيش يحصل عليه فكان يكتفى باجرته نظير العمل ويتبرع بكل ما يحصل عليه من بقشيش

اى ان هذا الرجل له فضل على كل من تلقى العلاج فى هذه المستشفى حتى لو كان غنيا.

فى مصر كان هناك محال لإصلاح  الاحذيه وتصنيعها..ويكون بها كرسى مرتفع قليلاً  يجلس عليه الشخص ليلمع له الولد حذاءه او يخلع حذاءه  ويعطيه له ليمسحه ويجلس هو يقرأ  اويفعل اى شئ لحين ان ينتهى.
وينتشر ماسحى الاحذيه فى محطات السكك الحديديه ومواقف الاتوبيسات والسيارات الاجرة وايضا فى اماكن المقاهى والكازينوهات.

الشاهد من الخاطرة..
كثير من المهن التى نستصغرها هى جزء اساسى من شكلنا واسلوب حياتنا وتؤثر بشكل مباشر على مكانتنا واداؤنا فلا تكتمل اناقتنا الابحذاء لامع جذاب
وفستان اوبدله متناسقه بخط المكوجى
وبيت نظيف مرتب من يد الخادمه
واطفال فى امان مع الدادة  او المربيه سواء فى المدرسه او البيت
وشارع نظيف نسكن فيه نتيجه مجهود الكناس وجامع القمامه....
وغيرهم كثيرين ممن يجملون حياتنا باشياء ضروريه ولكننا نكابر بدعوى انهم هامشيون.
فكيف يكون شكلك بفستان او بدله مكرمشه
وحذاء قذر وبيت غير مرتب ولا نظيف
وشارع ممتلاء بالزباله والروائح  الكريهه
او مدرسه بدون دادة تهتم بالاطفال
وغيرهم كثير....
هم اساسيون فى حياتنا فرفقا بهم
وليكن شكرنا لهم على قدر اهميتهم لنا
وقدر احتياجنا لهم
رفقا بهم وبانسانيتهم التى نهوى سحقها ووضعها تحت اقدامنا
الا من رحم ربى..
فالنشكرهم ونوصل لهم امتناننا من عملهم
ونرفع من انسانيتهم ونشعرهم بتقديرنا لعملهم
رفقا بهم..ورفقا بانفسنا.

الشوق الى الله

موقف..
وصلتنى رساله فى الميل تقول:
اذاعت الاخبار فى اندونيسيا قصه رجل فقير اسمه Mi'in هذا الرجل يبلغ من العمر 84 عاما ويعمل كناس فى شوارع إندونيسيا. ..
هذا الرجل استطاع ان يوفر من راتبه الذى يبلغ 300 ألف  روبيه أندونيسيه اى مايعادل 30 دولار فقط فى الشهر..استطاع ان يوفر ثمن رحله الحج ليحج هذا العام بعد 40 عاما من التوفير.
كان يوفر يوميا 2000 روبيه اى مايوازى 20 سنت امريكى
ويضعها فى كيس تحت المخدة التى ينام عليها..فهو لايملك حساب فى البنك ولا يتعامل مع البنوك من الأصل.
وفى نهاية  كل شهر يضيف ايضا مبلغ 5000 روبيه اى مايعادل 50 سنت امريكيه ..
وهكذا حتى اصبح يمتلك 40 مليون روبيه اى مايساوى 4000 دولار امريكى..
ذهب الى البنك وسجل اسمه فى حجيج هذا العام وسوف يغادر الى الحج هذا الاسبوع إن شاء الله.
"أريد  ان أرى  الكعبه.اريد ان ادعو الله لذلك ادخرت وادخرت وادخرت".
انتهت القصه
الشاهد...
هذا الرجل حجه على كل واحد وواحدة فينا لانه فقير وقد تسقط عنه الفريضه لان ركن الاستطاعه قد لايتحقق معه ولكنه استطاع..رغم فقره واحتياجه ولكنه مع الصبر والمثابرة استطاع..ومادام هو استطاع فكثيرمنا وقعت عليهم الحجه

..يا الله..
شوقه الى الله صادق لايشوبه رياء ولا أغراض فقط يريد رؤيه بيت الله..
كم منا تحجج بأولادة وكم تحجج بأعماله وكم تحجج بقله المال والدين وكم تحجج بالحر والزحام ..
الاتشتاقين لزيارة بيت الله والذهاب الى احب بلاد الله الى الله
يا مكه..كم انت فى القلب ياحبيبه رسول الله.
اخى الحاج الاندونيسى...
صبرت 40 عاماً  كلها حب وشوق لتنال رضا ربك
هذا هو الحب
هل يستوى هذا العامل الفقير الذى سار الى ربه 40 عاما وصبر على هذا الطريق ليحج بيت الله ويؤدى فريضه يحبها الله هل يستوى هو والغنى الذى لم يشغل باله بالامر سوى ساعات قليله ليرتب إجراءات  رحلته..
لايستوون..هيهات هيهات
اظهرت لنا تقصيرنا و ضئالتنا بجوار عظيم عملك وصدق نيتك وشوقك الى الله وحنينك الى زيارة بيته.
بارك الله لك وتقبل منك واعانك على اداء مناسك الحج إن شاء الله .
نحسبك على خير ولا نزكى على الله أحد
اللهم لاتحرمنا زيارة بيتك
اللهم اغفر لنا تقصيرنا
اللهم اغفر لنا قله صبرنا وفهمنا وادراكنا
اللهم اعنا اللهم اعنا اللهم اعنا.
جئنا اليك ياالله خاضغين خاشعين راجين رحمتك نخشى عذابك
اللهم اجعلنا من المقبولين
ولاتردنا خائبين يارب العالمين.
آمين

ماذا فعلت كلماتك.....ياوزيرالعدل#

أثارت تصريحات وزير العدل الكثير من الناس
لانه اهان عامل النظافة ووضعه فى المكان الذى
وضعه فيه المجتمع من قبل
ولكى يهدأ الناس وتكسب الحكومه نقطه عند الشعب
قبلت استقالته..او اقالته..الله اعلم.
فخرج الوزير الاسبق يؤكد كلامه ان ابن الزبال لن يكون
قاضيا وانه قال ان كلامه ذله لسان فقط ليهدا الجو او فى
هذا المعنى..
ثم خرج علينا رئيس نادى القضاة بإحدى المحافظات قائلاً
ان المحضر الذى فى المحكمه قد يكون مرتشيا
وان عامل النظافه اعتاد التسول وعسكرى المرور..
وان العرق دساس
وانهم كقضاة اسرة واحدة يتخيرون من يدخل بينهم حتى لا يدخل بينهم فاسد..
الامر ليس فى كلام الوزير ولكن الامر ان اولى الامر الذين يملكون ان يغيروا اوضاع كثيرة لا يتحركون من اجلها.
فالوزير يعلم ان الزبال مرتبه لا يتعدى 300 جنيه ورغم هذا يصر على ان يعلم ابنه ليكون افضل منه وان يعلمه من عمل حلال فهو لا يسرق ولا يتاجر فى الممنوعات ولا غيرها ..
ويحيا فقط على امل ان يرى ابنه فى مكان افضل من مكانه
فياتى وزير العدل الذى مهمته ان يعدل بين الناس يؤكد له انه حتى لو كان ابنك متفوق ومستوفى كل الشروط فان اباك الحقير عامل النظافه الشريف هو سبب انك لن تكون صاحب هذه الوظيفه..مع ان هذا غير دستورى..

كيف حال هذا الابن..... اليس هذا ماتعلمه فى مدارسكم التفوق
اليس هذا ماتتشدقون به فى جامعاتكم واحاديثكم التلفزيونية
والندوات والمؤتمرات..
هذا الابن سيكره اباه ويلعنه مئات المرات لانه علمه واراده ان يكون احسن منه.
وهذا الاب سيكرة نفسه ويلعن اليوم الذى صدق فيه كلامكم.

يا وزير العدل....
حتى الحلم حرمته على هذا الشريف وامثاله
كيف تعرف ان المحضر الذى يعمل فى محكمتك مرتشى
ولا تتصرف.....
وكيف ترى عسكرى المرور ياخذ الحسنه او الرشوة
ولا تتحرك..
هل العدل فقط فى مكتبك او القضايا التى تحكم فيها...
ام انت رمز للعدل حيثما تسير تنشره بين الناس
العادل الذى ياتى للناس بحقوقها وليس الذى يحط من اقدارها
هل سعيت لتحسين احوال المستضعفين
هل سعيت لرفعه اوضاع من يعملون فى دائرة عملك من محضرين وحاجبين وغيرهم..
ليس بالصدقه...  لا.. ولكن بإعلاء قيمه عملهم واهميته.

اطالبكم بتغير مناهج الدراسه فى المدارس والجامعات
ان ليس كل عمل شريف
وان الزبال هو المتسول
وان عسكرى المرور مرتشى
وان كل هذا ليس حرام..مادام فى السر
وانك لو كنت غنى وحرامى ومرتشى وتعطى الهدايا شمال ويمين  ..لن يحاسبك احد
بالعكس
سيحترموك جدا والامثله كتير على راسها مبارك واولادة وغيرهم.
دة المنهج الجديد مافيش حاجه اسمها عدل فى بلد لا تحترم وظائف مواطنيها وتحترمهم على اساس مهنهم وليس انسانيتهم.
وزير العدل....
عندما تقف بين يدى الله لا تنسى ان تقول له
ان ابن الزبال لا يستحق ان يكون قاضيا ليس لانه غير كفء مهنيا ولا لانه غير عادل ولكن... لان العرق دساس..
ولكم فى حكايه #عبدالحميد#شتا
عبرة
وحسبى الله ونعم الوكيل.
#وزير#العدل#الزبال#

الخال..خال

لما تكون فى مصيبه او كارثه تقيله عليك
وصعب تروح لابوك لانه مش حيحل المشكله على قد ماحيبهدلك.
وصعب تروح لامك لانها ممكن تروح فيها اصلا.
مافيش غير خالك
القلب الحنين والعقل المدبر💖
اول ماتحكى لخالك الكارثه خلاص تروح تنام وانت متاكد ان هو بيلف حوالين نفسه علشان يشوفلك حل.....
مش عشان سواد عنيك او خضارها او عسلى او اى لون علشان الناس اللى عماله تقول عنيا لونها كذا....لآ ثم لآ ..دة علشان امك اللى يخاف على كسرة قلبها فى حد من ولادها ولا انها تشوف ابنها متبهدل فى الدنيا...مع أنه حيتبهدل حيتبهدل....بس لا عمر خالك ما يسيبك أبداً حتى لو على حساب حاجات كتير انت ممكن ماتقدرهاش الا بعد وقت طوييييل جداً.
خالك الجميل اللى كان وهو راجع من الشغل يعدى على أخته يشوفها عامله إيه ويطمن عليها هى وحضراتكم..ولا مانع من حاجه حلوة فى جيبه تطلع بعد ماتطلع عينك على الجيب اللى انت واثق ان فيه حاجه حلوة لحضرتك..
وياسلام على الفسحه اللى فيها البحر والايس كريم وكل مالذ وطاب.
ويوم فرحك او خطوبتك اول واحد موجود وامك عماله توديه شمال يمين روح هات كذا رجع كذا وهو بكل سعادة بيجرى لسعدتك ليبسطك ويقف بجوار أخته فى اسعد ايام عمرها.
ولما يدخل بيتك ويزورك ويقعد مع اولادك يجمع بين حنان الجدة وجديه الجد فيكون له مكانته الخاصه عند اولادك.
هو دة الخال اللى اسمه مش بيتكتب فى شهادة ميلادك لكن هو موجود فى حياتك احيانا اكثر من اباء كثيرة..
هو دة الخال اللى مافيش عيد باسمه لكن وجوده هو العيد والسعادة..
وانا خالى مش أى خال انا خالى بطل من أبطال حرب اكتوبر العظيمة اللى مهما عملنا مش حنقدر نوفيه حقه..
تحيه عظيمه لخالى الحبيب اللى مهما قلت مش حقدر اوصف غلاوته عندى وحبى ليه ودعائى له بالصحه والرضا والستر.
ربنا يخليك لي ياخالى ومايحرمنيش منك ابدأ أبداً. .
عندك خال....ابعتيله الكلام دة

نحن والتراث

نحن لانعرف ان نتعامل مع ماهو قديم نرفضه ونلفظه..
اعتقادا منا انه تخلف ويمنعنا عن التقدم
حتى الاثار والمخطوطات الاثريه وكل ماتركه القدماء لنا واعتبرناه ثروة ومصدر دخل لكثير من العاملين فى مجال
السياحه لانحافظ عليه ...بل الكارثه ان من يدمره هم المستفيدين منه فى المقام الاول.
نحن لا نحافظ على تراثنا وغيرنا يصنع لنفسه تراثا ويحافظ عليه...
المبانى القديمه والفيلات التى تهدم فى كل مكان بايدى من ماتت قلوبهم عن قيمتها تراث ينهار وجذور تقلع بايديينا.
السيارات القديمه التى ركبها المشاهير من الفنانين والشخصيات العامة نراها تعمر الخرابات.
المشربيه والابواب الخشبيه القديمه التى صممها مهندسون اجانب وكانت من مظاهر جمال البيت تباع وتسافر الى الخارج يتم علاجها وترميمها وقد تعرض فى المعارض.
التراث مش لازم يكون حاجه قديمه لم تعد تصنع الان ..التراث ممكن يكون حاجات مازلنا نقدر نتعامل معاها ونعلمها لابناءنا
التراث فى مفرش كروشيه او تريكوا ...او فى مفرش لاسيه اللى فيه ناس عمرها ماسمعت الاسم دة.
التراث فى اى حاجه ممكن تعمليها باديكى شغل تطريز..خياطه
خرز....الخ من الحاجات الجميله اللى كانت بتفرغ شحنه التوتر الداخليه وتخليكى تنفصلى عن مشكلاتك ولو لوقت بسيط.
التراث فى مطحنه البن والسبرتايه وفنجان القهوة قبل او بعد شغل البيت.
التراث فى طقوس تخزين البصل والثوم والسمن والمربى وغيرها..
التراث فى صينيه جدتى وبراد امى وبرواز عمتى وفستان فرح لبسته احدى قريباتى.
التراث فى طربوش جدى وبيك اب عمى وفنجان شاى ابى وزجاجات برفان اخى.
حواديت جداتنا وحكاياتهم
ماكينه الخياطه ومقصاتهم
الحقوا حافظوا على حاجه منهم قبل مانختفى كلنا ولا يعد لنا اثر...اتركوا لانفسكم اثر طيب يحفر لهذه الاجيال جذورا تنجيهم من رياح التطور العاتيه.
اجعلوا لهم جذورا تثبتهم عند ضياع الهويه فنحن اصبحنا نستورد حتى تراثنا
فانوس رمضان..لمبه الجاز..البابور...حتى ابرة البابور مستوردة.
ياريت كل واحدة تسعى انها تثبت ماتعلم من تراثنا القديم حتى لو كان التراث دة اكله...وتعلمها لاكتر من واحدة وتحكيلها حكاية الاكله او الصنعه علشان ترجع لنا هويتنا ...بس نبدا
يلا نبدا.

ثانوية عامة. .والعيشه فله

معلش ياجماعه اصلها ثانوية عامة
مابتنامش... مابتاكلش ...عندها اكتئاب
معلش اصلها عندها ثانوية عامة
الام منهاره احسن ابنها مايجيبش مجموع
والاب بيصوت من فلوس الدروس والمراجعات
والمدرسين مصدقين نفسهم انهم السبب فى المجاميع العاليه
يقولك لو مستوى الطالب مش ممتاز يبقى مالوش مكان عنده
امال انت شغلتك ايه يامستر...مش برضوا علشان انت تخلى اللى مش بيجيب مجموع يشتغل ولا ايه.
المهم...تعالوا نتفق على شويه حاجات
أولاً. ..مهما عملتى مش حتاخدى غير اللى ربنا كاتبهولك
مش معنى كدة نقصر..لا نعمل اللى علينا من غير مانشيل هم ولا ننكد على نفسنا او نتوتر لانه بيجيب نتيجه عكسيه.
ثانياً. ..انتى فى أجمل ايام حياتك ...ايوة الثانوية العامة اجمل ايام حياتك واسالى كل الناس اللى كانوا في ثانوية عامة قبل كدة.يعنى المفروض حضرتك تستمتعى بكل لحظه فيها وتكونى عارفه ان كده كده حتروحى الدروس وتذاكرى ..فذاكرى بمزاج واستمتعى بكل مشوار واعملى منه ذكرى جميله.
ثالثاً. .. ودى اهم حاجه.. انها سنه وحتعدى بالطول او العرض حتعدى...فوسعى وكبرى دماغك علشان السنه تعدى بسلاسة
من اول يوم..رتبى دماغك
واعملى جداول مذاكرة ومراجعه
خليكى هاديه ومتوكله على الله
تفاءلى تفاءلى تفاءلى
ماتمشيش بدماغ حد ..انت مش زى صاحبتك
وهى كمان مش زيك.
وعلى رأى المثل 
تجرى يابنى ادم جرى الوحوش
إن كبر ابنك خاويه

وداعا فاتن حمامه

فاتن حمامه
الطفله التى بهرت الجمهور عندما تحدثت بمنتهى الجرأة أمام
الفنان والموسيقار محمد عبد الوهاب فى فيلم يوم سعيد..
تنبأ لها المخرجون بمستقبل فنى عظيم بسبب موهبتها الفذة
وثقلت هى هذا المستقبل بحسن أخلاقها والمحافظه على مكانتها وسمعتها.
من منا لم تتاثر بفاتن حمامه فى بدايتها مع الثلاثى عبد الحليم
أحمد رمزى عمر الشريف فى أيامنا الحلوة وبكينا عند رحيلها فى النهايه..
ومن لم تختنق من سوء تصرفها فى فيلم الحرام
ومن لم يحسدها عندما وقفت عند الباب المفتوح مع الرائع
صالح سليم .
ونذوب كلنا فى روعه اداءها امام العملاق الساحر احمد مظهر
فى دعاء الكروان.
وحدث ولا حرج عن افلامها مع عمر الشريف التى لا تستطيع ان تختار اي فيلم اجمل لانهم يسحرون العقل بروعه اداءهم
للشخصيات.
عاشت فاتن حمامه فى كل شخصيه قامت بها واثرت فينا اسعدتنا وابكتنا
تعلمنا منها واحترمنا فنها لاحترامها له ولذاتها
رحلت وستبقى صاحبه الضحكه الجنان
وداعاً فاتن حمامه

#فاتن حمامه#

2015

كل سنه وانتم طيبين..
دائما فى الوقت دة من كل عام كل الناس بتتكلم عن السنه اللى خلصت وغالبا بيكون كلام سلبى ...يعنى كانت سنه صعبه فيها حزن والم كتير ماشفناش فيها حاجة كويسه ..وطبعا الكلام دة مش كله صح احنا بس اللى بننسى اللحظات الحلوة.
وبيكون الكلام عن السنه الجديدة كله امنيات واحلام
حتكون احلى واجمل واسعد و.....الى اخر الاحلام والامنيات
لكن ايه اللى ممكن يغير الجديد عن القديم
لو احنا زى ماحنا يبقى مافيش حاجه حتتغير
لان الايام ثابته احنا اصحاب التغير

كم حاجه بدانا نعملها ومكملنهاش
قصه بدانا نقراها ومخلصنهاش ويمكن اكثر من كتاب
بلوفر بدانا نشتغله وسبناه فى الكيس اكتر من سنه
كورس فى اى حاجه لغه خياطه كمبيوتر.......
بدانا وبعد اول مستوى كسلنا...
اللى معطل مشروع جواز او خطوبه
واللى معطل فكرة انفصال
واللى مش عارف ياخد قرار افضل فى شغلى ولا فرار
واللى مش عايز يروح لدكتور يطمن على صحته
واللى بدات رجيم وبعد اول اسبوعين غيرت رايها
وغيرها مشاريع كتير مؤجله ومتعطله من غير سبب
بس الكسل والملل وتضيع الوقت
ونرجع نلوم على السنه انها كانت سيئة
ومش منجزة ولا طيبه.

خلى السنه دى تكون سنه اتمام المعلق من العمل
نكمل الحاجات اللى سيبناها ومكملنهاش..
واخر السنه حيكون فيه انجاز يخلى السنه تفرق معانا
فى نهايتها لاننا بحثنا من اولها على الانجاز.
وفى الحاله دى نودع السنه واحنا فرحانين باللى فات
ومستبشرين بالسنه الجديدة.